2013 елгы XXVII Бөтендөнья җәйге Универсиада, Казан,

6-17 июль
РУСENGТАТ

Екатерина Селезнева: «Волонтерларга аерым рәхмәт – алар, чыннан да, һәрвакыт ярдәм итәргә әзер!»

kazan2013.ru порталы укучылары игътибарына Екатерина Селезнева белән әңгәмә тәкъдим итә. Ул – Мәскәү өлкәсе өчен чыгыш ясый торган спортчы, Россия Кубогы өчен көрәштә ул ярышларның беренче яртысында икенче урында барды һәм соңгы көнне генә Маргарита Мамунны алга чыгарып, өченче нәтиҗә күрсәтте.

- Екатерина, ярышларның беренче көненнән соң, лидерлар арасында булсагыз да, планнарыгыз һәм өметләрегез белән уртаклашмадыгыз. Бүген Россия Кубогының бронза медале иясе ниләр кичерә?

- Әлбәттә, мин канәгать. Бу минем беренче зур җиңүем. Ярышларның тәмамлануы һәм минем өчен уңышлы тәмамлануы өчен мин бик шатмын.

- Кичә Евгения Канаева белән әңгәмә вакытында, ул һәр спортчы үзенә үзе мотивация эзли диде: кем өчендер коры нәтиҗә мөһим, кемдер тамашычы күңеленә кереп калырга тырыша. Ә Сезнең максатыгыз нинди?

- Нәфис гимнастика белән мин үзем өчен шөгыльләнәм. Бу шөгыль миңа бик ошый. Әлбәттә, нәтиҗәләр, тамашачының реакциясе дә мөһим, әмма миңа калса, иң мөһиме – үз эшеңне яратып, аннан тәм табып башкару.

- Яңа сезонга планнарыгыз бармы?

- Ярышлардан кайту белән яңа программа төзергә һәм киләсе ел башыннан гамәлгә керәчәк яңа кагыйдәләр нигезендә аны өйрәнә башларга кирәк. Күп әйберләр үзгәрәчәк – башка элементлар кертелә, бонуслар булдырыла. Бер күнегү көй астында гына түгел, ә сүзле җыр астында башкарылачак. Сүзле җыр куллану элек бөтенләй тыела иде. Хәзер моны күз алдына китерү кыенрак. Әмма нәтиҗәдә нәфис гимнастика тагын да камилләшер генә дип уйлыйм.

- Сезне саклый, ярдәм итә торган талисманыгыз бармы?

- Нәфис гимнастика белән шөгыльләнүче һәр кызныкы кебек минем дә яраткан йомшак уенчыгым бар. Ул – аю. Әмма якын кешеләреңнең, туганнарыңның, тамашачының ярдәмен тою күпкә мөһимрәк.

- Конкуренция сизеләме? Нәфис гимнастикада көндәшлек ни дәрәҗәдә?

- Көндәшлек бар. Әмма мин аны сизелә дип әйтмәс идем. Әгәр дә без бер үк шәһәрдән, бер мәктәптән килгәнбез икән, бер-беребезгә ярдәм итеп кенә торачакбыз.

- Чемпионатның оештыру дәрәҗәсен ничек билгелисез?

- Миңа бик ошады. Оештыручылар бик тырышканнар. Гимнастика үзәгенә килгәндә, биредә тренировка заллары, чыгыш ясау мәданы бик зур. Ә иң рәхәте – биредә һәркем ярдәм итәргә әзер тора. Моның өчен волонтерларга аерым рәхмәт!

«Казан 2013» Башкарма дирекциясенең Медиа департаменты